DOTORE HOLIDAYS, NAPOLI

Azkenengo uda honetan gure ipurdi zuriei atseden emateko beste toki bat aukeratzea erabaki genuen, Europako hondartza handietatik urrunduz. Pixka bat ikusita zegoen  Benidormen daikirisa edatea edo Espainiar estatuak Afrikako kostaldetik gertu daukan  kolonia zaharren batetik paseatzea.
 

Gure hautaketak ez zion erantzun irizpide turistiko soil bati. Denetik edukiko zuen helmuga baten bila gebiltzan : kultura, eguzkia, mediterraneoa, historia...
Parametro horiek guztiak hautatuz, nola ez genuen Napolin pentsatuko:
Greziarrek, erromatarrek, bizantinoek, normandiarrek, frantsesek eta espainolek konkistatutako hiria. Napoliko alde zaharrak Kulturen arragoa bat osatzen du, hiri hau erloju-bonba handi bat bilakatuz Vesubioren itzalpean.

Stone Island Napolin.

Italia iparraldearen begiradapean  hiri hau italiar penintsularen lotsaizuna da. Ez dira hain urrun geratzen egun batean Italiar Errepublikako Presidenteordea den Matteo Salvinik abestu zituen abesti haiek San Siron:

Oh kolerosi, terremotati,
Voi col sapone non ikusi nituen zazpi mai lavati
Napoli merda, Napoli colera,
Sei la vergogna dell 'Italia intera.

 Ultraeskuin italiarraren jokabide lotsagarria  argitara ematen duen abesti honek, 1974an Napoliko kostaldetik Europara sartu zen mediterraneoko kolera izurritea aipatzen du. Historialariak ados daude izurritea Tunezetik egoera txarrean ekarritako muskuiluen ondorioz hasi zela adierazterako orduan. Azalpen honek ez zien axola izan   Italiako politikari eskuindarrei, azken hauek Napoli menderaezina, aniztasunez betetako, hirigintzako arazo larriko, eta, batez ere,
Italiako ezkerrari lotua dagoen hiri gisa ikusi izan dutelako beti.

Hori guztia nire  Italiako lagun askok hirira iritsi aurretik  egin zizkidaten iruzkinetan islatzen da. Iruzkin guztiek, Napoles kriminalen, zikinkeriaren eta drogaren gotorleku gisa irudikatzen zuten. Iruzkin bakar bat ere ez zidanten egin Piazza Bellinin zerbitzatzen dituzten Limoncello Spritztarrei buruz, Via Tribunallin lau txanponen truke jaten dituzun pizzei buruz, ezta museoen aberastasun arkeologikoari buruz.

Mr. Parkas Vesubion.

Hori da Vesubioren semeek daramaten gurutzerik txarrena, haren barneko zauri handia, hiriak duen prentsa txarra.
Napolin lau ordu bakarrik egon behar duzu hau guztia gehiegikeria bat dela jakiteko.

Napolesek harrotasunez aldarrikatzen du bere burua komentario horien guztien aurrean. Egin ditudan bidai guztietan  sekula ez nuen ikusi hain harrotasun  eta nortasun handia duen hiririk: Jendeak balkoietatik kuboak jaitsiz erosten dio merkatariari nahi duen produktua. Bestetik, merkatu txikiek maukaz betetzen dituzte plaza nagusiak. Emakume helduek aulki tolesgarriak kalera ateratzen dituzte eta adeitasunez agurtzen zaituzte saihetsetik pasatzean, eskaleek zigarro bat eskatzen dizute eta etorri diren bezala, joaten  dira. Haurrek motorrak gidatzen dituzte eta txistu egiten dute, agurtzeko margotzen dute, aparta zaitezen txistu egiten dute eta entzun ditzazun margotzen dute.

Hara iritsitakoan, uste dut ulertu nuela zergatik Diegok hiri hau horrenbeste maite duen. Diego Villa Fioritotik atera zen
Europara bidean, berezko nortasunik ez duen gizarte desnaturalizatu bat aurkitzeko asmotan, baina aitzitik Napolesen aurkitu zuen bere Villa Fiorito handia. Maradonak Napolesekin egindakoa maitemin bat izan zen lehen begiratuan, baina Napolesek Maradonarekin daukan lotura, Espiritualtasunarekin pareka daiteke.  Hil zenetik ez dago  haren aurpegia, ezkerreko hanka edota zeruko elastikoa jantziz agertzen den argazkia irudikatzen ez duen kalerik. Via Toledotik Quartieri Spagnolirantz doan zati guztia astro argentinarrak eraikitako mausoleoa da eta ez da gutxiagorako.

Maradonari omenaldia Napolesen.

Diego da istorio honen erdigunea. Ezin da ulertu Napolin gaur egungo historia bera gabe. Napolitarren ustez, Diego 1980an hiria suntsitu zuen  lurrikara handi baten ondoren iritsi zen, zehazki Napoli etengabeko gainbeheran zegoen une batean. Maradonaren itzalaNapolin futbolaz haratago joan zen, hala egokitu baitzitzaion. Napolik eta Maradonak elkarrekin lortu zuten kopak eta ligak altxatzea, baita Napoles, bere argi eta itzalekin Europako panoraman kokatzea.

Maradonarekin, Napoli modan jarri zen eta inork ezingo du ulertu zergatik hiri honetan bizi diren betiko ahaztuak Maradonarekin zorretan egongo diren betirako. Kantari napolitar ezagun batek dio: Vesubioren semeak gara, egunen batean lehertu egingo gara. Ea une hau laster iristen den.

Napolesen ikusitako murala.

NAPOLES IS DOTORE.

Parkas jauna.